Kvoxar eru kynjaverur sem halda til í holtinu við Kópavogskirkju. Til eru ýmsar flökkusögur, sérstaklega hjá frumbyggjum bæjarins, um tilurð þeirra og uppátæki. Ekki er auðvelt að sjá Kvoxana berum augum, verður fólk frekar vart við nærveru þeirra, sérstaklega í ljósaskiptum eða við viss birtuskilyrði. Þeir sækja oft æti í sjó og eru glysgjarnir eins og krumminn. Þeir eru einstaklega hrifnir af öllu sem hefur upphaf og endi, eins og t.d. spottum og snærum, en eiga það til að flækjast og festast. Það þykir vita á gott verði maður var við Kvoxa (í híbýlum eða görðum), sér í lagi snúi maður til norðurs. Í seinni tíð hafa verurnar sótt mjög í Sundlaug Kópavogs og oft verið til ama. Þeir geta verið þjófóttir og stríðnir, sérstaklega við utanaðkomandi (úr öðrum bæjarfélögum). Fólk hefur til þessa verið ófúst við að láta bendla sig við Kvoxana, sagt er að það kunni ekki góðri lukku að stýra að tala opinberlega um tilvist þeirra og strákapör. Til eru dæmi þess að einstaklingar hafi lent í óútskýrðum óhöppum af ýmsum toga hafi þeir kvartað eða látið í ljós andstyggð sína á Kvoxum. En þeir þykja happafengur þeim sem þeir tengjast og treysta.

Allar sýningar opna föstudaginn 28. ágúst kl. 17 og verða opnar á almennum opnunartíma sýningarstaða til 4. september.